Tenerife – Fræðsluferð skóla

Tíu þúsund fet bjóða upp á glæsilega ferð, með bland af fræðslu, slökun og skemmtilegu hópefli á Tenerife, fyrir starfsfólk grunnskóla. Á eyjunni fögru bjóðum við góða og vandaða þjónustu íslensks fararstjóra, frábærar skoðunarferðir og skemmtilega afþreyingu fyrir starfsfólk grunnskólanna. Fræðsluferðirnar okkar til Tenerife bjóða upp á ævintýri og ógleymanlega skemmtun.

Glæsileg dagskrá: Áhugaverðar skólaheimsóknir, jóga á ströndinni með áherslu á hvað hægt er að gera með börnum og stórskemmtilegt hópefli í frábærum adrenlíngarði í fallegum furuskógi Tenerife. Allir dagskrárliðir eru styrkhæfir hjá KÍ. Ljúffengir hádegis- eða kvöldverðir á sérvöldum veitingastöðum í boði.

• Stórbrotin náttúra!
• Óviðjafnanlegt útsýni!
• Þjóðgarðar á heimsminjaskrá UNESCO!
• Matur og vín!
• Fræðsla og fjör!
• Skólaheimsóknir!
• Jóga!
• Adrenalín-klifurgarður!
• Fræðandi bæjarrölt!
• Vönduð íslensk fararstjórn!

Tenerife er stærsta og fjölsóttasta eyjan af þeim átta eyjum sem tilheyra Kanaríeyjunum. Hún er staðsett mitt á milli eyjanna Gran Canaria, La Gomera og La Palma. Tenerife er eldfjallaeyja sem talin er að hafi myndast fyrir 8 milljónum ára. Hún er í u.þ.b. 300 km fjarlægð frá meginlandi Afríku og í u.þ.b. 1300 km frá meginlandi Spánar. Eyjan er 2.034 ferkílómetrar að flatarmáli og er eins og þríhyrningur í laginu og fer hún hækkandi eftir því sem nær dregur miðju og nær hámarki með Pico del Teide sem er hæsta fjall Spánar í 3.718 m hæð yfir sjávarmáli. Santa Cruz er höfuðborgin þar sem búa um 250.000 íbúar en á eyjunni búa tæplega milljón manns. 

Meðalhiti á Tenerife er í kringum 22-25 °C en athugið að hitastigið getur verið lægra upp til fjalla.

Á Tenerife er veðrið einfaldlega gott allan ársins hring. Meðalhiti er um 20-22 gráður, á svalari dögum fer hitinn vart undir 15 gráður en sjaldan yfir 30 gráður í sumarhitum. Árstíðirnar koma og fara án þess að nokkur maður taki eftir því. Á suðurhluta Tenerife er eitthvert stöðugasta og besta loftslag á jörðinni – sól og blíða allan ársins hring.

Eyjan býður upp á fjölbreytta afþreyingu, þar sem m.a. er að finna stærstu go-kart braut í Evrópu ásamt einum allra glæsilegasta vatnsrennibrautagarði heims, Siam Park. Við ströndina er hægt að finna ýmsa afþreyingu; s.s. sjóskíði, bananabáta, siglingar og köfun.

Í gamla fiskimannabænum Los Cristianos ríkir skemmtileg stemning frá morgni til kvölds, en þar er að finna margar göngugötur með fullt af litlum verslunum, veitingastöðum og fleiru, sem skemmtilegt er að skoða. Svo tekur Playa de Las Américas strandbærinn við með stór hótel, margar verslanir auk verslunargötu. Hér eru veitingastaðir sem bjóða fjölbreyttan mat, t.d. kínverskan, indverskan og að sjálfsögðu spænskan. Þá er hér að finna fjölskrúðugt næturlíf með mörgum börum og dansstöðum. Í framhaldi af Playa de Las Américas tekur Costa Adeje strandsvæðið við með fjölda fallegra sandstranda, þar sem auðvelt er að láta alla þreytu líða úr sér í sólskininu. 

Margar verslanir eru á orlofsstöðunum. Göngugöturnar í Los Cristianos eru fullar af fallegum verslunum og þá má einnig finna fjölda verslunarkjarna á suðurströndinni: t.d. Parque Santiago 6, Siam Mall, X Sur, El Duque og Safari. Þar má einnig finna stórmarkaði, veitingastaði og markaði sem haldnir eru reglulega á svæðinu.

Playa de las Américas, oft kallað Las Américas, er einn af vinsælustu áfangastöðum Tenerife, staðsettur á suðurhluta eyjarinnar. Svæðið er þekkt fyrir iðandi mannlíf, afslappað andrúmsloft, fallegar strendur, fjölbreytta afþreyingu og frábæra veitingastaði. Las Américas er frábær staður fyrir þá sem leita að skemmtun, afslöppun og fjölbreyttum afþreyingarmöguleikum á Tenerife!

Dagur 1

Ferðadagur

Dagur 2

Jóga á ströndinni: Förum á hina rólegu og fallegu Bobo-strönd, sem er í aðeins 20 metra fjarlægð frá hótelinu. Þar tekur jógakennari á móti okkur og kennir okkur að nýta jóga og öndunaræfingar með börnum. Hún ætlar einnig að aðstoða okkur við að endurnæra líkama og sál. (Styrkhæf dagskrá af KÍ)

Dagur 3

Skólaheimsókn: Í boði verður að heimsækja opinbera grunnskóla og/eða einkaskóla. Fróðlegar og fræðandi skólaheimsóknir til að kynnast starfsemi kanarískra grunnskóla á ólíkum aldursstigum. (Styrkhæf dagskrá af KÍ)

Dagur 4

Adrenalín-klifurgarður & fegurð fjallanna – Teide-þjóðgarðurinn. Höldum upp til fjalla í klifurgarðinn Forestal Park, þar  sem ætlunin er að láta adrenalínið flæða um æðarnar með alls kyns klifri eftir ákveðnum þrautabrautum. Fáum kennslu og farið í allskonar þætti sem m.a. varða traust og forystuhæfileika. Farið verður yfir helstu öryggisatriði og búnað  áður en hópnum er sleppt lausum í fjörið. Að því loknu verður keyrt í gegnum þjóðgarð El Teide, þar  sem hæsta fjall Tenerife verður barið augum 3.718 m hátt. (Styrkhæf dagskrá af KÍ)

Við mælum þessari viðbót:

Matur & vín. Eftir adrenalín-ævintýrið er í boði að koma við á vínbúgarði, þar sem Donna & Diego taka höfðinglega á móti okkur en þau eru vinaleg hjón sem hafa rekið vínbúgarð í fjöllunum í áratugi. Þau leggja áherslu á lífræna vínrækt og hafa hlotið fjölda gullverðlauna fyrir vínin sín. Hópnum gefst  kostur á að fara út á vínakurinn, upplifa áhugaverða vínsmökkun, kynnast lífrænni vínframleiðslu hjónanna og bragða á góðum vínum þeirra og mat. Úr sveitasælunni heldur hópurinn síðan saddur og sáttur niður til strandar. (Valfrjálst)

Dagur 5

Frjáls dagur

Dagur 6

Ferðadagur

Athugið að hægt er að framlengja og bæta við frjálsum dögum.

Langar þig til að fræðast um kanarískt skólastarf og kynnast menningu og daglegu lífi eyjarskeggja með vandaðri íslenskri leiðsögn? Viltu njóta matar og víns í góðum félagsskap skemmtilegs samferðafólks ásamt því að dvelja á góðu hóteli á sólríkri suðurströnd eyjarinnar fögru? Ef svarið er JÁ, þá er þetta rétta ferðin fyrir þig. 

Þetta hafa farþegar okkar úr kennaraferðum á Tenerife að segja:

,,Vorið 2023  fór ég í námsferð til Tenerife ásamt hópi fólks.  Ferðin var mjög vel skipulögð og allar áætlanir stóðust eins og kostur var. Fararstjórnin einkenndist af léttu andrúmslofti, mikilli þekkingu á staðháttum, gleði, öryggi og góðri þjónustulund. Kærar þakkir fyrir mig.”

Svava Aðalbjörg Kristjánsdóttir.

,,Takk, takk elsku Rún og Trausti, þið stóðuð ykkur frábærlega! Ég hef nokkrum sinnum komið til Tenerife en aldrei kynnst eyjunni eins og ég gerði í þessari ferð með ykkur. Ég fór í frábærar ferðir, þar sem allt skipulag var til fyrirmyndar og á meðan ekið var um eyjuna fengum við allskonar skemmtilegan fróðleik, sem notalegt var að hlusta á. Takk kærlega fyrir mig, pottþéttir fararstjórar sem ég mæli með. Hlakka til að fara með ykkur aftur í ferð! “

Magnea Guðný Hjálmarsdóttir.

„Við hjónin mælum heilshugar með fararstjórn Rúnar og Trausta. Síðasta sumar ferðuðumst víða um eyjuna Tenerife á þeirra vegum og fórum um eyjuna m.a. í rútu, á bíl og fótgangandi og allt gekk eins og í sögu, vel ígrundað, skipulagt og skemmtilegt. Þau voru alltaf með vellíðan og öryggi okkar í huga og maður fann það sterkt. Það besta við ferðina með þeim var hversu fróð þau voru um staðhætti og sögu staðarins, sögðu skemmtilega frá og kynntu fyrir manni matsölustaði innfæddra, leyndar perlur eyjarinnar og náttúruna.“

Eva Rós og Jóhannes.

Gist er á 4* hótelinu Iberostar Waves Bouganville Playa með hálfu fæði. Hótelið stendur á fallegri útsýnishæð við sjóinn, mitt á milli hinna vinsælu strandsvæða Playa de Las Américas og Costa Adeje á suðurhluta Tenerife. 

Herbergin, sem öll hafa nýlega verið tekin í gegn, eru björt og falleg, með góðum rúmum og bjóða upp á öll helstu þægindi m.a. fría nettengingu. 

Sólbaðsaðstaða er til fyrirmyndar, þar sem boðið er upp á handklæði til að leggja á sólbekki við sundlaugarsvæðið. Eins er sérstakt sólbaðssvæði fyrir þá sem vilja njóta góðrar slökunar. Við sundlaugina er síðan að finna sundlaugarbar, sem býður upp á léttar veitingar. 

Í veitingasal er boðið upp á mjög fjölbreyttan og ljúffengan mat, þar sem allir eiga að geta fundið eitthvað við sitt hæfi og í salnum er kokkur sem eldar beint ofan í mannskapinn. 

Sameignarsvæði býður einnig upp á sal, sem tekur allt að 50 manns, þar sem hægt er að halda fundi eða aðra viðburði. Þá er hægt að stunda líkamsrækt, fara í nudd og snyrtimeðferðir á hótelinu. 

Gestamóttaka er opin allan sólarhringinn.

Mjög stutt frá hóteli eru frábærar gönguleiðir meðfram allri strandlengjunni, þá er einnig skammt frá hótelinu að finna verslunarkjarnann SIAM MALL, vatnsrennibrautagarðinn SIAM PARK og hinn glæsilega golfvöll Golf Las Américas.

Hótelinu er annt um umhverfið og notast við vistvæna stefnu og býður til að mynda ekki upp á einnota plastumbúðir.

Vinsamlega athugið að ljósmyndir af gististöðum, sem birtar eru á heimasíðu Tíu þúsund feta, eru fengnar frá gististöðunum. Þær eru aðeins til þess að gefa hugmynd um útlit þeirra. Tíu þúsund fet bera ekki ábyrgð á því ef eitthvað hefur breyst á gististöðunum frá því að ljósmyndir voru teknar. Tíu þúsund fet stjórna ekki staðsetningu farþega innan gististaða.

Fararstjórinn Tanja Líf Traustadóttir er menntuð leikkona, sem hefur tekið að sér mörg fararstjóraverkefni á Tenerife og sá m.a. um kennarahóp síðast liðið vor á eyjunni fögru. Hún bjó til margra ára á Tenerife og hefur fullkomið vald á spænskri tungu og getur því aðstoðað við öll helstu samskipti sem snúa m.a. að skólaheimsóknum og eins veitt góða innsýn í hvernig er að vera íslenskur nemandi í spænsku skólakerfi. Tanja Líf er líka einstaklega hjálpleg og þekkir eyjuna eins og lófann sinn og getur því bæði veitt góða innsýn inn í líf eyjaskeggja og víðtæka aðstoð. 

Flug:

• Flug með Play
• Flugvallagjöld og skattar.

Farangur:

• Ferðataska 20 kg

Hótel:

• Gisting á 4* hóteli í 5 nætur

Fæði:

• Morgunmatur á hóteli.

Akstur

• Akstur til og frá flugvelli á Tenerife.
• Akstur í skoðunarferð.

Dagskrá

• Jóga á ströndinni
• Skólaheimsókn
• Adrenalín- og klifurgarðurinn

Fararstjórn

• Vönduð íslensk fararstjórn tveggja þaulreyndra fararstjóra Tíu þúsund feta.

Í nafni náttúrunnar

• Gróðursetning á trjám á Íslandi fyrir hvern farþega sem fer í ferðina.

EKKI INNIFALIÐ

• Hádegis- og kvöldverður
• Drykkir
• Valfrjálsir dagskrárliðir
• Ferðatryggingar
• Þjórfé