Tenerife – Gönguferð

Í þessari einstöku gönguferð í þjóðgörðum Tenerife, kemst göngugarpurinn ekki bara í snertingu við hina ósnortnu friðuðu náttúru, heldur upplifir hann einnig sterkt hvernig lífið á Tenerife var áður en ferðamannastraumurinn barst til eyjarinnar. Gengið verður í mikilli fjallafegurð, þar sem landslagið einkennist af miklum andstæðum, hrauni og iðagrænum gróðri, með háum og tignarlegum fjöllum og djúpum dölum og gljúfrum.

Gönguferðin byrjar í þjóðgarði El Teide en hann hefur verið settur á heimsminjaskrá UNESCO og munum við klífa Guajara-fjallið sem er þúsund metrum lægra en hæsta fjall Spánar, El Teide eða í 2.718m en þegar upp á toppinn er komið blasir við víðáttumikið útsýni til allra átta.

Þá verða teknar fjórar fjallgöngur í háu og stórbrotnu fjalllendi Anaga-skagans en landslagið þar einkennist einnig af miklum andstæðum, þar sem iðagrænir regnskógar mæta hrjóstrugu landslagi með kaktusum og agave-plöntum. Farið verður á slóðir, sem ferðamenn fara öllu jafna ekki á m.a. í gegnum gömul vatnsgöng.

Þá verður gefinn frjáls dagur í hinni fallegu borg Puerto de La Cruz á Tenerife en frá henni er einnig auðvelt að taka leigubíl eða strætó til allra átta, m.a. til höfuðborgarinnar Santa Cruz, þar sem kjötkveðjuhátíðin mun standa yfir með glaum og gleði. Toppurinn er svo slökun á yndislegu 4* hóteli nálægt miðbænum í Puerto de La Cruz.

• Stórbrotin náttúra!
• Óviðjafnanlegt útsýni!
• Þjóðgarðar á heimsminjaskrá UNESCO!
• Matur og vín á verðlauna vínbúgarði!
• Veitingastaður í helli!
• Fjall frumbyggjanna!
• Hárin rísa í vatnsgöngum!
• Afskekkt þorp!

Tenerife er stærsta og fjölsóttasta eyjan af þeim átta eyjum sem tilheyra Kanaríeyjunum. Hún er staðsett mitt á milli eyjanna Gran Canaria, La Gomera og La Palma. Tenerife er eldfjallaeyja sem talin er að hafi myndast fyrir 8 milljónum ára. Hún er í u.þ.b. 300 km fjarlægð frá meginlandi Afríku og í u.þ.b. 1300 km frá meginlandi Spánar. Eyjan er 2.034 ferkílómetrar að flatarmáli og er eins og þríhyrningur í laginu og fer hún hækkandi eftir því sem nær dregur miðju og nær hámarki með Pico del Teide sem er hæsta fjall Spánar í 3.718 m hæð yfir sjávarmáli. Santa Cruz er höfuðborgin þar sem búa um 250.000 íbúar en á eyjunni búa tæplega milljón manns. 

Meðalhiti á Tenerife er í kringum 22-25 °C en athugið að hitastigið getur verið lægra upp til fjalla.

Anagaskaginn

Anagaskaginn á norðausturhluta Tenerife er elsti fjallgarður eyjarinnar, en þar einkennist landslagið af bröttum og tignarlegum gróðursælum fjallgörðum. Gönguleiðir og umhverfi Anagaskagans minna einna helst á sviðsmynd í ævintýralegum kvikmyndum á við Lord of the Rings. Göngugarpurinn kemst ekki bara í snertingu við hina ósnortnu friðuðu náttúru þessa einstaka þjóðgarðs, heldur upplifir hann einnig sterkt hvernig lífið á Tenerife var áður en ferðamannastraumurinn hófst á eyjunni. 

Guajara

Fjallið Guajara, sem er staðsett í þjóðgarði El Teide er 2.718 m hátt og er þar með fjórða hæsta fjall Tenerife. Guajara ber nafn sitt frá prinsessu á tímum frumbyggjanna, guanches, en hún á að hafa klifið fjallið og kastað sér fram af björgum þess í sorg sinni eftir að eiginmaður hennar Tinguaro féll í orrustu í borginni La Laguna gegn Spánverjum.

Puerto de La Cruz

Gamli bærinn í Puerto de la Cruz er líflegur og skemmtilegur með fallegum húsum, kirkjum og göngugötum og skemmtilegum verslunum. Hafnarsvæðið og hafnargarðarnir eru einnig skemmtilegir og sitthvoru megin við þá er að finna tvær sandstrandir sem notalegt er að heimsækja. Útfrá annarri þeirra eru jafnframt fallegar og gróðursælar gönguleiðir sem ná í raun langleiðina eftir allri norðustrandlengju eyjarinnar.

Ein elsta kapella Kanaríeyja er einnig að finna í miðbæ Puerto de la Cruz og heitir hún Ermita de San Amaro. Hún er frá 16. öld og var hún vígð með það að markmiði að kristna frumbyggjana. Í strandbænum, alveg niðri við sjávarsíðuna, er líka fallegur sundlaugagarður, Lago Martianez, og í miðjum bænum er síðan að finna einn glæsilegasta dýragarð veraldar, Loro Parque.

Í bænum má einnig finna fallega grasagarða frá 18. öld, annars vegar El Botánico og hins vegar Jardin de Orquideas þar sem rithöfundinn frægi, Agatha Christie, vandi komur sínar og fékk hugmynd að bók sinni The Mysterious Mr. Quin. Síðan eru líka fallegar og litríkar tröppur í bænum tileinkaðar rithöfundinum þar sem hver og ein trappa táknar bókakjöl bóka hennar. Þar er svo einnig barinn San Telmo Lido sem varð frægur fyrir það eitt að hafna Bítlunum að spila á sínum tíma. Þá er flottur golfvöllur í nágrenninu og stórir verslunarkjarnar ofar í bænum.

Fimmtudagurinn 27. febrúar– Ferðadagur – Flug frá Keflavíkurflugvelli kl. 9:10

Föstudagurinn 28. febrúar– Fjallganga: Guajara 2.718 m – 8,3 km – Matur og vín á vínbúgarði

Laugardagurinn 1. mars– Fjallganga: Chamorga – Roque Bermejo – 8,7 km

Sunnudagurinn 2. mars– Fjallganga: Leynileiðin – Óvissuferð – 8,9 km

Mánudagurinn 3. mars – Frjáls dagur

Þriðjudagurinn 4. mars– Fjallganga: Taborno – Afur – 9 km

Miðvikudagurinn 5. mars– Fjallganga: Cruz de Carmen – 5,5 km – hellaveitingastaður

Fimmtudagurinn 6. mars – Ferðadagur – Flug kl. 15:50 frá Reina Sofia flugvelli

Ferðin flokkast undir það sem kallast ,,tveir skór“. Sumar göngurnar svipa til göngu upp á Esju en ávallt er hluti leiðanna niður á við eða á jafnsléttu. Mikilvægt er að göngufólk sé í góðu gönguformi.  Ein leiðin gæti reynst erfið fyrir lofthrædda, en þar er samt um mjög stuttan kafla leiðarinnar að ræða, sem er nokkuð brattur á aðra höndina, kannski 3 mínútna leið, en þá er líka alltaf möguleiki á að fara aðra leið til baka, þar sem tveir fararstjórar fara með í ferðina. Þess ber  að geta að aldrei er um þverhnípi að ræða og göngustígar nokkuð breiðir. Önnur leið gæti reynst erfið fyrir þá sem eru með innilokunarkennd en sá kafli tekur þó fljótt af og vert að taka fram að göngin eru mannhæða há og tæpur metri á breidd. Elsti farþegi sem hefur farið með okkur þessar leiðir var kominn yfir sjötugt. 

Gist er á 4* hótelinu AF Valle Orotava með hálfu fæði.

Hótelið er vel staðsett í Puerto de la Cruz, einum af stærri strandbæjum eyjarinnar fögru. Sameignarsvæði hótelsins er fallegt og innréttað í notalegum stíl. Móttakan er opin allan sólarhringinn. Herbergin eru björt, snyrtileg og vel útbúin með flatskjá, minibar og þráðlausu interneti. Á hótelinu er sundlaugasvæði með tveimur sundlaugum og sólbekkjum. Þar er einnig heilsulind og líkamsræktaraðstaða. Veitingastaður og hótelbar eru með snyrtilegasta móti.

Öll herbergi hótelsins eru innréttuð með hlýlegum litum og búin fyrsta flokks húsbúnaði.

Glæsileg heilsulind hótelsins býður meðal annars uppá sauna, blautgufu og jacuzzi.

Vinsamlega athugið að ljósmyndir af gististöðum, sem birtar eru á heimasíðu Tíu þúsund feta, eru fengnar frá gististöðunum. Þær eru aðeins til þess að gefa hugmynd um útlit þeirra. Tíu þúsund fet bera ekki ábyrgð á því ef eitthvað hefur breyst á gististöðunum frá því að ljósmyndir voru teknar. Tíu þúsund fet stjórna ekki staðsetningu farþega innan gististaða. Athugið einnig að gististaðir geta breyst en þá er ávallt boðið upp á sambærilega gististaði eða betri.

Í gönguferðum Tíu þúsund feta fara þaulreyndir íslenskumælandi fararstjórar með í ferðirnar. Þeir hafa gengið í um og yfir 50 gönguleiðir á eyjunni fögru og sumar leiðirnar hafa þeir farið oftar en einu sinni og oftar en tvisvar ýmist með gönguhópum eða á eigin vegum. Þeir störfuðu í rúm 12 ár sem fararstjórar á Tenerife og eru því viskubrunnar um sögu og náttúru eyjarinnar. Nú gefst gönguáhugafólki einstakt tækifæri til þess að ganga á nokkrum af þeirra uppáhalds gönguleiðum sem fáir hafa kynnst.

Fimmtudagurinn 27. febrúar – Koma til Tenerife

Flogið er frá Keflavíkurflugvelli með flugfélaginu Play kl. 9:10 og lent á Reina Sofia flugvellinum á suðurhluta Tenerife kl. 14:50. Rútur bíða farþega fyrir utan flugstöðvarbygginguna en þaðan er keyrt í rúma klukkustund til Puerto de La Cruz, þar sem dvalið verður á fjögurra stjörnu hótelinu Valle Orotava. Hótelið er í göngufjarlægð frá huggulegum miðbæ borgarinnar, þar sem er að finna notalegar kaffiteríur og veitingastaði ásamt verslunum. 

• Innifalið: Kvöldverður og íslensk fararstjórn og rútuferð frá flugvelli.
• Ekki innifalið: Drykkir með kvöldmat.

Föstudagurinn 28. febrúar kl. 8 – 16

Guajara 2.718 m – Heilsdagsferð – 8,3 km – upphækkun 621 m – 3 – 4 klst.

Gangan hefst í um 2.000 m hæð yfir sjávarmáli í stórbrotnu landslagi þjóðgarðsins El Teide, sem hefur verið settur á heimsminjaskrá UNESCO, en umhverfið einkennist bæði af sérstöku gróðurfari og mikilli litadýrð ólíkra bergtegunda. Gangan hefst á þægilegri upphitun á jafnsléttu en svo hefst uppstig og er heildarhækkun 621 m. Þegar toppurinn hefur verið sigraður blasir við einstaklega fallegt útsýni til allra átta yfir eyjuna fögru m.a. yfir eldfjallið El Teide 3.718 m og nokkrar eyjar í Kanaríeyjaklasanum. 

Eftir gönguna er komið við á vínbúgarði, þar sem göngugörpum gefst kostur á að smakka lífrænt ræktað vín þeirra hjóna Donnu og Diego, ásamt því að kynnast kanarískri matarmenningu og sögu vínframleiðslunnar á búgarðinum.

• Nauðsynlegt er að hafa með sér vatn/orkudrykk og nasl í fjallgönguna. 
• Innifalið: Íslensk fararstjórn, rútuferð, morgunmatur, hádegismatur og kvöldmatur.
• Ekki innifalið: Drykkir með kvöldmat.
• Akstur frá Puerto de La Cruz til Guajara tekur um 45 mín. Akstur frá Guajara til vínbúgarðsins tekur um 40 mín. og þaðan til Puerto de La Cruz tekur aksturinn um eina og hálfa klukkustund.

Laugardagurinn 1. mars kl. 8-16

Chamorga – Roque Bermejo – Heilsdagsferð – 8,7 km – upphækkun 667 m – 4,5 klst – hringleið. 

Gönguleiðin hefst í hinu afskekkta þorpi Chamorga, sem er staðsett í 478 m hæð yfir sjávarmáli á norðausturhluta Tenerife. Þaðan er gengið niður eftir ægifögru gljúfri, sem einkennist af háum, bröttum og tignarlegum fjöllum og einstöku gróðurfari niður að pínulitlu strandþorpi Roque Bermejo. Í þorpinu, sem er mjög einangrað, býr fólk sem lifir á því sem sjórinn og landið gefur og verður gefin góð stund í að rölta um þorpið og virða fyrir sér stórbrotna ströndina, þar sem hinn tignarlega klett Roque Bermejo má berja augum og flottan vita sem trónir upp á háum tindi ofan við þorpið. Eftir heimsókn í þorpið hefst uppstig, þar sem óviðjafnanlegt útsýni blasir við til allra átta meirihluta leiðarinnar til baka. Eftir gönguna er keyrt sem leið liggur niður til bæjarins San Andrés og stutt stopp gert við Teresitas-ströndina.

• Nauðsynlegt er að hafa með sér vatn/orkudrykk og nasl í fjallgönguna. 
• Innifalið: Íslensk fararstjórn, rútuferð, morgunverður, nesti í hádegi, ein vatsnflaska og kvöldverður. 
• Ekki innifalið: Drykkir með kvöldmat.
• Akstur frá Puerto de La Cruz til Chamorga tekur um eina og hálfa klukkustund. Sama leið keyrð tilbaka með viðkomu í bænum San Andrés. 

Sunnudagurinn  2. mars kl. 8-16

Leynileið – Heilsdagsferð – 8,9 km – 574 m upphækkun – 5 klst. – hringleið.

Gönguleið fyrir göngugarpa í leit að ævintýrum. Gengið er frá pínulitlu fjallaþorpi, leyniþorpi, utan í og uppá háa fjallstinda Anaga-skagans, þar sem lárviðarskógur og fjölbreytt gróðurfar einkennir umhverfið og er útsýnið óviðjafnanlegt til allra átta. Leiðin er ekki fjölfarin og á köflum er erfitt að átta sig á hvar stígurinn liggur og fyrir vikið verður hún ævintýralega skemmtileg. Þá er farið í gegnum tvö gömul vatnsgöng, en sú leið fær hárin til að rísa í myrkrinu. 

• Nauðsynlegt er að hafa með sér vatn/orkudrykk og nasl í fjallgönguna ásamt ennisljósi/vasaljósi.
• Innifalið: Íslensk fararstjórn, rútuferð, morgunverður, nesti í hádegi og ein vatnsflaska, kvöldverður.
• Ekki innifalið: Drykkir með kvöldmat.
• Akstur frá Puerto de La Cruz til upphafspunktar gönguleiðarinnar tekur rúma klukkustund og sama leið keyrð til baka.

Mánudagurinn 3. mars – Frjáls dagur

Á frjálsum degi er tilvalið að safna orku og njóta sólar fyrir síðustu göngur ferðarinnar á sundlaugarsvæði hótelsins sem er með fallegu útsýni frá þakinu, upp til El Teide og eins yfir Puerto de La Cruz. Eins er hægt að fara og sóla sig og slaka á á ströndum borgarinnar eða kíkja í skemmtilegan miðbæinn, sem er skammt frá hótelinu, en þar er að finna gamlar byggingar, góða veitingastaði og kaffiteríur auk fjöldann allan af verslunum svo fátt eitt sé nefnt. Þá er sundlaugargarðurinn Lago Martianez, einstaklega skemmtilegur. Nágrannaborgin La Laguna er líka ekki langt frá Puerto de La Cruz og auðvelt að koma því við að heimsækja þá afar fallegu og áhugaverðu borg. Í höfuðborginni Santa Cruz mun kjötkveðjuhátíðin standa sem hæst og því er einnig möguleiki á að skella sér í búning og kíkja á fjörið þar, en hátíðin er sú önnur stærsta í heimi á eftir kjötkveðjuhátíðinni í Rio de Janeiro.

• Innifalið:  Morgunverður og kvöldverður.
• Ekki innifalið: Drykkir með kvöldmat.

Þriðjudagurinn 4. mars kl. 8-16

Taborno – Afur – Heilsdagsferð – 9 km – lækkun um 700 m – 3 – 4 klst.

Gönguleiðin hefst hjá fallegum útsýnisstað, Pico del Inglés, á toppi Anagaskagans en síðan er gengið í gegnum þéttan regnskóginn, þar sem stórir burknar og lárviðartré með mosavöxnum trjástofnum einkenna leiðina. Þegar komið er út úr skóginum opnast falleg víðátta með tignarlegri fjallasýn í allar áttir og brattur Taborno-kletturinn blasir þar við mest áberandi. Gengið er í átt að klettinum og komið við í litlu þorpi, þar sem húsin standa á hálfgerðum fjallshrygg innan um skógivaxnar hlíðar en þetta þótti kjörinn staður til að búa á m.a. vegna skjólsins við klettinn, þar sem hægt var að fela sig fyrir óvinum. Í dag ríkir róleg stemning yfir þorpinu, þar sem heimamenn rækta m.a. grænmeti og ávexti á gróðurstöllum við ótrúlegar aðstæður í bröttum fjallshlíðum sem ná upp í 900 m hæð yfir sjávarmáli. Frá Taborno er gengið niður í hið afskekkta þorp Afur, sem er staðsett í sannkölluðum ævintýradal, þar sem er að finna rennandi vatn og kvakandi froska en þetta er einn af fáum stöðum eyjarinnar Tenerife þar sem er að finna rennandi vatn allan ársins hring. Toppurinn á ferðinni er svo klárlega heimsókn á 60 ára gamlan bar í bænum, þar sem boðið er upp á tugi ef ekki hundruð tegunda af snöpsum. Rúta sækir hópinn í Afur.

• Nauðsynlegt er að hafa með sér vatn/orkudrykk og nasl í fjallgönguna. 
• Innifalið: Íslensk fararstjórn, rútuferð, morgunverður, nesti í hádegi og ein vatnsflaska. Kvöldverður.
• Ekki innifalið: Drykkir með kvöldmat.
• Akstur frá Puerto de La Cruz til Pico del Inglés tekur um rúma klukkustund. Akstur frá Afur til Puerto de La Cruz tekur um eina og hálfa klukkustund.

Miðvikudagurinn 5. mars kl. 8-16

Cruz del Carmen – Heilsdagsferð – 5,5 km – lækkun 390 m – 2 klst.

Hin óviðjafnanlega gönguleið Cruz del Carmen hefst í þéttum og fallegum lárviðarskógi í 953 m yfir sjávarmáli. Leiðin er meira eða minna öll niður á við og á jafnsléttu en byrjað er á að ganga í gegnum þéttan skóg þar sem friðsæld og gróðurilmur fagurgrænnar náttúrunnar umvefur göngugarpinn. Skógarbotninn á það til að vera sleipur og getur því verið ágætt að taka göngustafi með í þessa göngu. Þegar komið er út úr skóginum opnast víðátta og útsýni yfir háar og brattar skógivaxnar hlíðar tignarlegra fjalla Anagaskagans. Á leiðinni má sjá gömul sveitahús, sem minna á gamla tímann þegar heimamenn ræktuðu grænmeti á gróðurstöllum við erfiðar aðstæður í bröttum fjallshlíðunum. Þá er ekki ólíklegt að hópurinn rekist á kanarískar kindur og geitur á leiðinni. Göngunni lýkur í hellabænum Chinamada, sem var fyrst byggður af frumbyggjum eyjarinnar. Í bænum verður boðið  til kanarískrar tapasveislu á hellaveitingastað sem grafinn hefur verið inn í berg. Að máltíð lokinni er gengið inn í fjallaþorpið og út á tanga þar sem stórfenglegt útsýni blasir við. Rúta sækir hópinn í Chinamada.

• Nauðsynlegt er að hafa með sér vatn/orkudrykk og nasl í fjallgönguna.
• Innifalið: Íslensk fararstjórn, rútuferð, morgunverður og hádegismatur með drykk. Kvöldmatur.
• Ekki innifalið: Drykkir með kvöldmat.
• Akstur frá Puerto de La Cruz til Cruz Del Carmen tekur um 45 mín. og um eina og hálfa klukkustund frá Chinamada til Puerto de La Cruz.

Fimmtudagurinn 6. mars – Heimferð

Lagt af stað með rútu frá Valle Orotava hótelinu í Puerto de La Cruz kl. 12:00. Ekið á Reina Sofia flugvöllinn á suðurhluta Tenerife og tekur aksturinn rúma klukkustund. Flogið til Íslands með flugfélaginu Play kl. 15:50 og er áætluð lending á Keflavíkurflugvelli kl. 21:35.

• Innifalið: Morgunverður, íslensk fararstjórn og rútuferð á flugvöll.

Vinsamlega athugið

Ofangreind dagskrá er birt með fyrirvara. Tíu þúsund fet áskilja sér rétt til að breyta dagskrá ef á þarf að halda með tilliti til veðurs og annarra aðstæðna, að sjálfsögðu með heill farþega í fyrirrúmi.

Flug:

• Flug með Play frá Keflavíkurflugvelli til Reina Sofia á Tenerife.
• Flug með Play frá Reina Sofia til Keflavíkurflugvallar.
• Flugvallagjöld og skattar.

Farangur:

• Ferðataska 20 kg
• Persónulegur hlutur sem kemst undir flugsæti

Hótel:

• Gisting á 4* hóteli í 7 nætur í Puerto de La Cruz.

Fæði:

• Morgunmatur á hóteli.
• Samlokur í þremur gönguferðum.
• Vatnsflaska í öllum gönguferðum.
• Hádegisverður á hellaveitingastað m/drykk.
• Hádegisverður á vínbúgarði m/drykkjum.
• Kvöldmatur á hóteli (drykkir ekki innifaldir)

Akstur

• Akstur til og frá flugvelli á Tenerife.
• Akstur í skoðunarferðum.

Skoðunarferðir

• Fimm frábærar gönguferðir í fjalllendi Tenerife.

Fararstjórn

• Vönduð íslensk fararstjórn tveggja þaulreyndra fararstjóra Tíu þúsund feta.

Í nafni náttúrunnar

• Gróðursetning á trjám á Íslandi fyrir hvern farþega sem fer í ferðina.

EKKI INNIFALIÐ

• Drykkir með kvöldverði
• Ferðatryggingar
• Þjórfé

• Bakpoki 
• Göngufatnaður (gott að hafa létta peysu/vindjakka með í för).
• Gönguskór
• Derhúfa 
• Sólarvörn (einnig fyrir varir).
• Sólgleraugu
• Ennisljós
• Vatnsflaska 
• Göngustafir (fyrir þá sem eru vanir því).
• Plástur, þ.m.t. hælsærisplástur.
• Steinefna- og verkjatöflur.
• Pappírsþurrkur/klósettpappír.
• Hirslu fyrir rusl. 
• Vararafhlöðu fyrir síma (sniðugt að búa til pláss fyrir myndir).
• Auka bolur og strandskór (eftir göngur).